Wasaaradda Shaqada iyo Arrimaha Bulshada ee Jamhuuriyadda Federaalka Soomaaliya ayaa maanta qabatay shirka Guddiga Hagida Mashruuca Xirfadaha Shaqada iyo Kobcinta Wax-soo-saarka Dhalinyarada (SEIP).
Shirka waxaa si rasmi ah u furay Mudane Caynaanshe Yuusuf Xuseen, Wasiiru Dowlaha Wasaaradda Shaqada iyo Arrimaha Bulshada, kaas oo hoosta ka xariiqay muhiimadda ay leedahay wada-shaqeynta iyo is-xirka dhinacyada ku lugta leh mashruuca si loo xaqiijiyo natiijooyin wax ku ool ah oo taageera horumarinta xirfadaha dhalinyarada Soomaaliyeed.
Inta lagu guda jiray shirka, waxaa lagu falanqeeyay dib u eegista howlaha la dhammeeyay iyo kuwa wali socda, iyadoo sidoo kale diiradda la saaray arrimaha mudnaanta leh ee u baahan in si wadajir ah looga shaqeeyo si loo dardar geliyo fulinta qorshayaasha mashruuca SEIP.
Wasiiru Dowlaha Mudane Caynaanshe ayaa uga mahadceliyay dhammaan xubnihii ka socday Wasaaradaha Federaalka, loo-shaqeeyayaasha, Xarumaha Tababarka iyo xubnaha howl-fulinta mashruuca, isagoo ku booriyay in la sii adkeeyo iskaashiga iyo wada-shaqeynta joogtada ah.
Ugu dambeyn, shirka ayaa kusoo dhammaaday isfaham iyo heshiis buuxa, iyadoo xubnaha guddigu ay si rasmi ah u meel mariyeen Qorshaha Howlaha Mashruuca iyo Orodoska Maaliyadeed ee sanadka 2026.
